ملح السوالف

على باب الجرح دك جفك بسجين
واعرف دكتك وافتح شراييني
لأن فيما مضى للروح جنت الروح
ومكانك سابقا" مابيني وبيني
تأخرت بمجيئك وينك امن اسنين؟
يل امسلب شبابي ابحالي خليني
ذبل ورد المحنه ومات بيه الشوك
تمنيتك كبل موهسه تسكيني
جوعانه السنين ويوم يأكل يوم
عصرن ماي عمري وشربن سنيني
جفت وجهي الملامح والفرح مغتاض
واجه خيط الصبر يم نار سجيني
واكل عيني السهر كمت احلم احلم بيك
ولاطارش وصل منك يواسيني
قفل بابه الكلب لالا تمر خطار
والموكد طفه ونامت فناجيني
ومشيت ابلايه خطوه وكاعي تنضح خوف
عثرت ابذكرياتك باقيه ابطيني
جنت مثل السطح مكشوف كلي اوياك
ضنيتك سمه وتفهم مضاميني
وضكت مر الحقيقه ابكاس من صدمات
من ايدك جنت كل ساعه ترويني
وكبل سوطك قلم والظهر جان اوراق
اكتبت فوكي قصايد لسه تاذيني
وتطشرني المصيبه واسكر ابلواي
وتلملمني المصايب وارجع لديني
وكلت خبز السوالف شفتي ويه اشفاك
وبس ملح السوالف واكف ابعيني
انه عيني بصيره والجفوف اطوال
مااذل للعنب وارفعله جفيني
وصح ضكت العنب بس هوه ينـزل جان
ابضميرك ياعنب هم كتلك انطيني؟؟
انه سوالف قديمه وحسجة الشياب
ويمر وجهك حداثه ايريد يلغيني
تضحكني اشوكت؟وانه ابجي عمري الراح
ماامشي بعد خلف اليبجيني
انذرت كلبي اذبحه بيوم بي انساك
وهسه انته افتهم هاليوم اسد ديني
الشاعر
سيف الحلفي [center]